ފުވައްމުލަކުގައި އަލީ ފަޒާދޭ ބުނެފި ނަމަ އޭނާ މަޝްހޫރު ވެފައި އޮންނާނީ އެންމެންނާ ވެސް ގުޅޭ، މަޖާ މިޒާޖެއްގެ ބޭފުޅެއްގެ ގޮތުގަ އެވެ. ސިޔާސީ ފިކުރު ތަފާތު މީހުންނާ އެކު ވެސް އުޅުއްވާނެ އެވެ. އެހެންމީހުންނަށް ވީ ވަރަކުން އެހީތެރިވުމާއި ރަށުގެ އެކި ކަންކަމުގައި އެހީތެރިކަން ފޯރުކޮށްދިނުމަކީ އޭނާގެ ވަރަށް ބޮޑު އުފަލެކެވެ. ރައްޔިތުންގެ މަޖިލިހުގެ ފުވައްމުލަކު މެދު ދާއިރާގެ މެމްބަރުކަން މިދިޔަ ފަސް އަހަރުގެ ތެރޭގައި އޭނާ ކުރެއްވި ނަމަވެސް ފުވައްމުލަކާ ދެމެދު އޮންނަ ގާތް ގުޅުމަކަށް ބަދަލެއް ނާދެ އެވެ. މަޖިލިހަށް ހާޒިރުވެވަޑައިގަންނަވަން ނުޖެހޭ ނަމަ ގިނަ ދުވަސްވަރު ފަޒާދު އުޅުއްވާނީ ރަށުގަ އެވެ. ރައްޔިތުންނާ އެކު އެވެ. ވަގުތު ހޭދަކުރައްވަނީ އަނބިކަނބަލުންނާއި ކުދިންނާ އެކު އެވެ.
ޕްރޮފައިލް
ފަޒާދުގެ ސިޔާސީ ހަޔާތް ފެށުނީ އުމުރުން 18 އަހަރުގަ އެވެ. ފުރަތަމަ ސިޔާސީ ވަޒީފާ އަކީ ރަށު އޮފީހުގެ އެހީތެރިޔާ (ގްރޭޑް 2) ގެ މަގާމެވެ. އޭނާ ވަނީ އެ މަގާމުގައި ހުންނަވައިގެން ސަރުކާރުގެ ތަފާތު ޕްރޮޖެކްޓުތަކުގައި އެކި ރަށްރަށާއި ބައެއް ގައުމުތަކަށް ވެސް ވަޑައިގެންފަ އެވެ. ޚާއްސަކޮށް ޒުވާނުންނާ ގުޅޭ ވަރަށް ގިނަ ޕްރޮޖެކްޓުތަކުގައި ފަޒާދު އަމަލީ ގޮތުން މަސައްކަތް ކުރެއްވި އެވެ.
ފަޒާދު ވަނީ ސިވިލް ކޮމިޝަން އުފެދުމާ އެކު، ފުވައްމުލަކު ކަތީބުކަން ކުރައްވައިފަ އެވެ. އަދި ރާއްޖޭގައި ބޭއްވި ފުރަތަމަ ލޯކަލް ކައުންސިލްތަކުގެ އިންތިޚާބުގައި (2012 ވަނަ އަހަރު) ޑީއާރުޕީގެ ޓިކެޓުގައި ފުވައްމުލަކު އަތޮޅު ކައުންސިލަށް ވާދަކުރައްވައި ފުވައްމުލަކު މެދު ދާއިރާގެ ގޮނޑި ކާމިޔާބު ކުރެއްވި އެވެ. އަތޮޅު ކައުންސިލްގައި ފަޒާދު ވަނީ ނައިބު ރައީސްކަމާއި ރައީސްކަން ވެސް ކުރައްވައިފަ އެވެ. ގާތްގަނޑަކަށް އަށް މަސް ވަންދެން އަތޮޅު ކައުންސިލްގެ ނައިބު ރައީސްކަން އަދި ދެ އަހަރާއި ހައެއްކަ މަސް ވަންދެން އެ ކައުންސިލްގެ ރައީސްކަން ފަޒާދު ކުރެއްވި އެވެ.
ފަޒާދު މިހާރު ހުންނެވީ ރައްޔިތުންގެ މަޖިލިހުގެ ފުވައްމުލަކު މެދު ދާއިރާގެ މެމްބަރަކަށެވެ. އެ ދާއިރާ އަށް އޭނާ ހޮވިވަޑައިގަތީ 2014 ވަނަ އަހަރު ބޭއްވި އާންމު އިންތިޚާބުގަ އެވެ. ޕީޕީއެމްގެ ޓިކެޓުގައި އެ ފަހަރު އިންތިޚާބަށް ނުކުމެވަޑައިގެން ބޮޑު ކާމިޔާބީއެއް ފަޒާދު ހޯއްދެވީ ފުވައްމުލަކުގެ އަދި ރާއްޖޭގައި ވެސް މަޝްހޫރު ވިޔަފާރި ވެރިޔާ އަހުމަދު އިބްރާހިމް ދީދީ (ކެމްޕަސް ޑީޑީ) ބަލިކުރެއްވުމަށް ފަހު އެވެ.
މި ފަހަރުގެ އިންތިޚާބުގައި އޭނާ ވާދަކުރައްވަނީ ފުވައްމުލަކު ދެކުނު ދާއިރާ އަށެވެ.
ފުވައްމުލަކު އަތޮޅު ކައުންސިލްގައި ހޭދަކުރެއްވި މުއްދަތުގައި އެ ކައުންސިލުން ވަނީ ގިނަ މަސައްކަތްތަކެއް އެ ދައުރުގައި ފުވައްމުލަކަށް ކޮށްދީފަ އެވެ. އޭގެ ތެރޭގައި ފުވައްމަލު މަސް މާރުކޭޭޓު ޒަމާނީ ފެންވަރަށް ތަރައްގީ ކުރުމާއި މަސްވެރިންނަށް އައިސް ލިބޭނެ އިންތިޒާމު ހަމަޖައްސައި ދިނެވެ.
ފަޒާދު ވިދާޅުވާ ގޮތުން އޭނާ ކައުންސިލަށް ވަޑައިގެންނެވިއިރު، ރައްޔިތުންގެ އެކައުންޓުގައި ހުރީ 849،000ރ. އެވެ. އެކަމަކު ފަޒާދު ކައުންސިލްގައި ހޭދަކުރެއްވި ތިން އަހަރުގެ މުއްދަތު ނިންމަވައި އޭނާގެ ޓީމު އެ ތަނުން ނުކުމެވަޑައިގެންނެވިއިރު އެ އެކައުންޓުގައި ތިން މިލިއަނަށް ވުރެ ގިނަ ރުފިޔާ ހުއްޓެވެ. އެ ތިން އަހަރު ނިންމުމަށް ފަހު، ފަޒާދާއި އޭނާގެ ޓީމުން ކައުންސިލުން ނުކުތީ ފުވައްމުލަކު އަތޮޅު ހޮސްޕިޓަލަށް އެއް ލައްކަ ޑޮލަރުގެ ސާމާނު ހަދިޔާ ކޮށްފަ އެވެ. މި ނޫން ވެސް އެތައް ކަމެއް ފަޒާދުގެ ކައުންސިލްގެ ދައުރުގައި ފުވައްމުލަކަށް ކޮށްދީފައި ވެ އެވެ.
ފަޒާދު ވަނީ ފުވައްމުލަކުގައި ވޮލީ ކުރިއަރުވަން ގިނަ މަސައްކަތްތަކެއް ކުރައްވައިފަ އެވެ. ޚާއްސަކޮށް އަންހެނުންގެ ވޮލީ ޓީމު ކުރިއަރުވަން އޭނާ އިސްވެ ގިނަ މަސައްކަތްތަކެއް ކުރެއްވި އެވެ. ގައުމީ އަންހެން ވޮލީ މުބާރާތުގެ ތަށި ދެ ފަހަރު އެ ޓީމުން ނެގި އެވެ. އެއީ ފުވައްމުލަކަށް މިހާތަނަށް ހޯދުނު އެންމެ ބޮޑު އެއް ޝަރަފެވެ.
ފުވައްމުލަކުގައި ޕްރީ ސްކޫލް ހިންގުމުގެ އިންގިލާބެއް ގެންނެވީ ވެސް ފަޒާދެވެ. ކިޑްސް ހައުސްގެ ނަމުން ނަން ދީފައިވާ ތަން 2102 ގައި ހުޅުވުމަކީ އެ ސިޓީ އަށް ވެސް ލިބުނު ބޮޑު އުފަލެކެވެ. މިހާރު ކިޑްސް ހައުސް ހިންގަނީ ކެންގަރޫ ކިޑްސްއާ ގުޅިގެންނެވެ. އެއީ ރަށުގައި ތިބެގެން އިންޓަނޭޝަނަލް ފެންވަރަށް ކިޔެވުމަށް ހުޅުވައި ދެވުނު ދޮރެއް ކަމަށް ފަޒާދު ވިދާޅުވި އެވެ. ސްކޫލްގައި 30 ވަރަކަށް މުވައްޒަފުން ތިބޭއިރު އެއީ އޭނާގެ ފަރާތުން ފުވައްމުލަކަށް ކޮށްދެވޭ ވަރަށް ބޮޑު ކަމެއް ކަމަށް ފަޒާދު ވިދާޅުވި އެވެ.
އެންމެ ފަހުން ބޭއްވި އާންމު އިންތިޚާބަށް ފަޒާދު ނުކުންނެވީ ފުވައްމުލަކަށް ސިޓީގެ ދަރަޖަ ހޯދައި ދިނުމަށެވެ. އޭނާ އެކަން ކުރައްވައިފި އެވެ.
މި ފަހަރުގެ އަމާޒަކީ ފުވައްމުލަކުގެ ޒުވާނުންނަށް ވަޒީފާ އާއި އިގުތިސޯދީ ކުރިއެރުންތައް ހޯދައި ދިނުމެވެ.
"މި ފަހަރު މި ބަލަނީ އެންމެ މަދުވެގެން ވެސް 100 އެނދުގެ ހޮޓަލެއް ފުވައްމުލަކަށް ހޯދައި ދޭން. ފުވައްމުލަކުގެ ޒުވާނުންނަށް ޓާފް ދަނޑުގައި ކުޅޭނެ ފުރުސަތު ހޯދައި ދޭން. ވޮލީ ކުޅޭ މީހުންނަށް މިހާރަށް ވުރެ ރަނގަޅު ކޯޓުތަކުގައި ކުޅެވޭނެ ގޮތް ހޯދައި ދޭން. މިހާރަށް ވުރެ ހަރުދަނާ، ފެންވަރު ރަނގަޅު ތައުލީމީ ނިޒާމެއް ހޯދައި ދޭން. ގިރާ ސަރަހައްދު ހިމާޔަތް ކުރުމާއި މަގު ހެދުން ފަދަ ކަންކަން ކުރެވޭނެ މަގެއް ހޯދައި ދޭން އަޅުގަނޑު މި ފަހަރު ނުކުންނަނީ،" ފަޒާދު ވިދާޅުވި އެވެ.
ފުވައްމުލަކުގެ މަސްވެރިންނަށް ޒަމާނުއްސުރެ ދިމާވެފައިވާ ދަތިތަކަށް ދާއިމީ ހައްލެއް ހޯދައި ދިނުމަކީ ވެސް އޭނާގެ އަމާޒެކެވެ. މަސް ކިރާނެ ބޯޓެއް ނެތުން ފަދަ ކަންކަމަކީ ފުވައްމުލަކުގެ މަސްވެރިންނަށް އޮތް ގޮންޖެހުމެކެވެ.
"ވަރަށް ބޮޑެތި ވާހަކަތަކުގެ ވާހަކަ މި ދެއްކީ. އެކަމަކު ސަރުކާރުގެ ކަމާ ބެހޭ ފަރާތްތަކާ އެކު މަޝްވަރާ ކުރަމުން މިދަނީ މި ކަންކަން ކުރާނެ ގޮތަކާ މެދު. ވަރަށް ގިނަ ދާއިރާތައް ކަވަރު ވާ ގޮތަށް ފެހި ސިގްނަލެއް ލިބިފައި ވަނީ. ބައެއް ކަންތައްތައް ޕްރައިވެޓް ސެކްޓާ އަށް ވެސް އިންވެސްޓް ކުރެވޭނެ،"
