އިންފޮމޭޝަން ޓެކްނޮލޮޖީގެ ދާއިރާއިން މަތީ ތައުލީމް ހާސިލްކުރައްވާފައިވާ އިކްރާމަކީ މާލެއަށް އުފަން ބޭފުޅެކެވެ. އެކަމަކު އޭނާގެ މަންމަ ނިސްބަތްވަނީ މ. މުއްޔަށެވެ. އައިޓީގެ އަމިއްލަ ވިޔަފާރިއެއް ފަށައި "ފިއެސް" އަކީ ސޮފްޓްވެއާގެ ރޮނގުން ރާއްޖޭގެ މަޝްހޫރު ކުންފުންޏަކަށް ހެއްދެވި އެވެ. ގާތްގަނޑަކަށް 25 އަހަރުގެ ތަޖުރިބާއާ އެކު އޭނާ ވަނީ 500 އަށް ވުރެ ގިނަ މުވައްޒަފުން ގޮވައިގެން މަސައްކަތް ކުރައްވައިފަ އެވެ.
ޕްރޮފައިލް
ސިޔާސީ ދާއިރާ އިން އޭނާ އެންމެ ފުރަތަމަ ގުޅިވަޑައިގަތީ 2013 ގައި ޖޭޕީއާ އެވެ. އެއަށް ފަހު ރައީސް އިބްރާހިމް މުހައްމަދު ސޯލިހަށް ވެރިކަން ހޯދައިދޭން މިދިއަ އިންތިހާބުގައި ގިނަ މަސައްކަތްތަކެއް ކުރެއްވި އެވެ. އެމްޑީޕީއާ ގުޅިވަޑައިގަތީ ރިޔާސީ އިންތިޚާބަށް ފަހު އެވެ. އަދި އެ ޕާޓީގެ ޕްރައިމަރީގައި ވާދަކުރައްވައި ދިއްގަރު ދާއިރާގެ ޓިކެޓު ކަށަވަރުކުރެއްވި އެވެ.
ހުޅުމާލޭގައި މީހުން އަލަށް ވަޒަންވެރިވިއިރު އެ މީހުންގެ ތެރޭގައި އެކުވެރިކަމާއި އެއްބައިވަންތަކަން އުފައްދަން އިކްރާމް ޖަމިއްޔާއެއް އުފެއްދެވި އެވެ. އެ ޖަމިއްޔާގެ ތެރެއިން ގިނަ މަސައްކަތްތަކެއް ވެސް ކުރި އެވެ. އޭގެ އިތުރުން ކްލަބް/ޖަމިއްޔާތަކަށް އެކި ގޮތްގޮތުން އެހީތެރިކަން ދެއްވައި، ދިއްގަރުގެ ސްކޫލާއި ހެލްތު ސެންޓަރަށް ވެސް އޭނާ އެހީ ދެއްވި އެވެ.
އިކްރާމްގެ މެސެޖަކީ މި އެވެ؛ ދިއްގަރު ދާއިރާގެ ރަށްތަކުގެ ހާލަތު ބަދަލުކުރެވޭނީ ދާއިރާގެ ކަންކަން އެނގޭ މީހަކަށެވެ. އޭނާއަކީ އެންމެ ކުޑައިރުއްސުރެ ދިއްގަރާއި އެ ދާއިރާގެ އެހެން ރަށްތަކާ ގާތް ގުޅުމެއް އޮތް ބޭފުޅެކެވެ. އެހެންކަމުން ރަށްރަށަށް ބޭނުންވާ ކަންކަން ރަނގަޅަށް އެނގިވަޑައިގަންނަވަ އެވެ.
