މީދޫ ދާއިރާގެ މެމްބަރު ރޮޒައިނާ އާދަމްގެ ފިރިކަލުން ނާޝިޒު އޭލެވެލް ނިންމެވުމަށް ފަހު އެންމެ ފުރަތަމަ ވަޒީފާކުރެއްވީ އެއާ މޯލްޑިވްސްގަ އެވެ. އެގޮތުން އެކައުންޓެންޓް ޓްރެއިނީއެއްގެ ވަޒީފާގައި 1992 އިން 1994 އަށް ހުންނެވުމަށް ފަހު ޓޫރިޒަމް މިނިސްޓްރީގެ އެކައުންޓް އޮފިސަރަށް ބަދަލުވި އެވެ. އެތަނުގައި 1997 އާ ހަމަޔަށް މަސައްކަތްކުރެއްވުމަށް ފަހު މަތީ ތައުލީމަށް ވަޑައިގަތީ އޮސްޓްރޭލިޔާއަށެވެ. ކާޓިން ޔުނިވާސިޓީގައި ކޮމާސް އާއި އެކައުންޓިން ދާއިރާއިން ކިޔެވުމަށް ފަހު އުޅުއްވަނީ ވިޔަފާރީގެ ދާއިރާގަ އެވެ. އެގޮތުން 2000 އިން ފެށިގެން އަންނަނީ ޓޫރިޒަމް ދާއިރާ އާއި މަސްވެރިކަމުގެ ވިޔަފާރީގައި ހަރަކާތްތެރިވަމުންނެވެ.
ޕްރޮފައިލް
ޑީއާރުޕީގެ ކުރީގެ ލީޑަރު އަހުމަދު ތަސްމީން އަލީގެ އެއްބަނޑު ކޮއްކޮ ކަމަށްވާ ނާޝިޒް ސިޔާސީ ދާއިރާ އަށް ނުކުމެވަޑައިގަތީ ޑީއާރްޕީންނެވެ. އެގޮތުން 2009ގެ ރައްޔިތުންގެ މަޖިލިހުގެ އިންތިހާބުގައި ޑީއާރްޕީގެ ޓިކެޓްގައި ވާދަކުރައްވައި އަލިފުށީ ދާއިރާއަށް ވާދަކުރައްވައި ގޮނޑި ކާމިޔާބުކުރެއްވި އެވެ. އެމްޑީޕީއާ ގުޅިވަޑައިގަތީ ޑީއާރުޕީ ރޫޅުމުންނެވެ.
ނާޝިޒް ގެންދަވަނީ އިޖުތިމާއީ ދާއިރާއިން އާންމުންނަށް ބޭނުންވާ އެހީތެރިކަން ފޯރުކޮށްދެއްވަމުންނެވެ.
އޭނާގެ މެސެޖަކީ "ކޮރަޕްޝަން ހުއްޓުވައި އިންސާފު ގާއިމްކުރަން މަޖިލީހުގެ ތެރެއިން މަސައްކަތް ކުރާނެ" ކަމެވެ.
