ކ. ދިއްފުއްޓަށް އުފަން ރާފިއު ވަނީ އެ ރަށުގެ ކުޑަ ކަތީބުކަން 15 އަހަރު ވަންދެން ކުރައްވައިފަ އެވެ. އެއަށް ފަހު އެޓާނީ ޖެނެރަލް އޮފީހުގައި ފަސް އަހަރު މަސައްކަތް ކުރެއްވި އެވެ. އަމިއްލަ ކުންފުންޏެއްގެ މެނޭޖަރުކަން 12 އަހަރު ވަންދެން ކުރައްވާފައިވާ ރާފިއު ވަނީ މެނޭޖްމަންޓް ދާއިރާއިން މަތީ ތައުލީމް ހާސިލްކުރައްވައިފަ އެވެ.
ޕްރޮފައިލް
ރާފިއުގެ ސިޔާސީ ހަޔާތް ފެއްޓެވީ އެމްޑީޕީންނެވެ. އެގޮތުން އެ ޕާޓީ އުފެދުނީއްސުރެ އޭނާ އަކީ އެ ޕާޓީގެ އާއްމު މެމްބަރެކެވެ. އެކަމަކު މިއީ އޭނާ ކުރިމަތިލައްވާ ފުރަތަމަ އިންތިޚާބެވެ.
އިޖުތިމާއީ ގޮތުން ހިންގާ ހަރަކާތްތަކުގައި ބައިވެރިވުމުގެ އިތުރުން ތުލުސްދޫ ދާއިރާ ހިމެނޭ ރަށްރަށުގައި މީގެ ކުރިން ބޭއްވި އެފަދަ ކަންކަމަށް އޭނާގެ އެހީތެރިކަން އެކި ގޮތްގޮތުން ފޯރުކޮށްދެއްވާފައިވެ އެވެ.
ރާފިއު ވިދާޅުވަނީ ބޭސްފަރުވާ އާއި ތައުލީމް ހިލޭ ލިބިގެން، އަބުރުވެރިކަމާ އެކު ދިރިއުޅެވޭނެ ފަދަ އުޖޫރައެއް ކަށަވަރުކޮށްގެން، އާއިލާތަކަށް ދެމެހެއްޓެނިވި ގޮތުގައި އިންސާފާއި ހަމަހަމަކަން ކަށަވަރުކުރެވޭނެ މާހައުލެއް ފަހިކޮށްދިނުމުގެ މަސައްކަތަށް އޭނާ ހުންނެވީ ތައްޔާރުވެގެންނެވެ.
