ކެޔޮދުއަށް އުފަން ގާސިމްގެ ހަޔާތުގެ ބޮޑު ބައެއް މާލޭގައި ހޭދަކުރެއްވިޔަސް ރަށުގައި ހިނގާ ކަންކަން ވަރަށް ކައިރިން ބައްލަވަ އެވެ. ރަސްމީ ތައުލީމް ނިންމާލެއްވުމަށް ފަހު މެނޭޖްމަންޓު ކޯހެއް ހައްދަވައި ޕްރައިވެޓް ދެ ކުންފުންޏެއްގައި އިސް މަގާމުތަކެއް އަދާކުރެއްވި އެވެ. އެއަށް ފަހު އޭނާ ފެއްޓެވީ ކޮންސްޓްރަކްޝަން ސާމާނު އިމްޕޯޓުކޮށް އެ ވިއްކުމުގެ އަމިއްލަ ވިޔަފާރި އެވެ.
ޕްރޮފައިލް
ސިޔާސީ ހަރަކާތްތަކުގެ އިސް ސަފުން ގާސިމް ނުފެނިދާނެ އެވެ. އެކަމަކު އޭނާއަކީ އެމްޑީޕީގެ މުހިއްމު މެމްބަރެކެވެ. އެ ޕާޓީއާ 2012 ގައި ގުޅިވަޑައިގަތުމަށް ފަހު އެމްޑީޕީއަށް ވެރިކަން ހޯދައި ދިނުމަށް ގިނަ މަސައްކަތްތަކެއް ކުރެއްވި އެވެ. މުޒާހަރާތަކާއި އެއްވުންތަކުގައި ބައިވެރިވެ ހައްގު ހޯއްދަވަން އަޑުއުފުއްލެވި އެވެ. ފާއިތުވި 24 އަހަރު ރާއްޖޭގައި ގާތްގަނޑަކަށް 13 އިންތިޚާބެއްގެ ކެމްޕެއިންގައި އޭނާ އުޅުއްވި އެވެ. އެކަމަކު މިއީ އިންތިހާބަކަށް ގާސިމް ކުރިމަތިލެއްވި ފުރަތަމަ ފަހަރެވެ.
ބޭރުގެ ބަޔަކާ ގުޅިގެން ކެޔޮދޫ ރަށްވެހި ކްލަބުން އެ ރަށުގައި ހެދި އިޖުތިމާއީ މަރުކަޒުގެ މަސައްކަތުގައި ގާސިމް މުހިއްމު ދައުރެއް އަދާކުރެއްވި އެވެ. އޭގެ އިތުރުން ކެޔޮދު އާއި ރަކީދޫގައި ބާއްވާ އިޖުތިމާއީ ހަރަކާތްތަކަށް އޭނާ އެހީތެރިކަން ދެއްވި އެވެ.
ގާސިމް ވިދާޅުވަނީ "އެޖެންޑާ 19ގައި ހިމެނޭ ކަންތައްތައް ތަންފީޒުކުރަން ވޯޓު ދިނުމުގެ ގާބިލްކަން ހުރި ކަމަށާއި ރައީސް އިބްރާހިމް މުހައްމަދު ސޯލިހު ހެޔޮ ވެރިކަމެއް ކުރެއްވުމަށް އެހީތެރިކަން ދޭނެ" ކަމަށެވެ.
