ރައީސް އިބްރާހީމް މުހައްމަދު ސޯލިހްގެ ކޮއްކޯފުޅު އަލީ ނިޔާޒަކީ ވެރިކަން ކުރާ ކޯލިޝަންގެ މައި ޕާޓީ އެމްޑީޕީ އުފެއްދީއްސުރެ އެޕާޓީގައި ދެމިހުންނެވި ބޭފުޅެކެވެ. އެ ޕާޓީގެ ޗެއާޕާސަންގެ ނައިބު މާލީގެ މަގާމުގައި މިހާރު ވެސް ހުންނެވި ނިޔާ ވަނީ އިސް ގިނަ މަގާމުތަކެއް އަދާކުރައްވައިފަ އެވެ.
މަޖީދިއްޔާގައި ތައުލީމު ހާސިލްކުރެއްވި އިރު އޭނާއަކީ އޭރު އުފެދުނު މޮޅު ކްރިކެޓް ކުޅުންތެރިއެކެވެ. ސްކޫލް ނިންމެވުމަށް ފަހު 12 އަހަރު ޓޫރިޒަމް ދާއިރާގައި އުޅުއްވި އެވެ. އެގޮތުން އޭރު ޓޫރިޒަމްގެ ބޮޑު ކުންފުންޏެއް ކަމަށްވާ ސަފާރީ ޓުއާސްގެ ފައިނޭންސް ބައިގެ މެނޭޖަރުކަން ކުރެއްވި އެވެ.
ޕްރޮފައިލް
ނިޔާ ސިޔާސީ މަސައްކަތްތައް ފެއްޓެވީ ބޭބޭފުޅު އިބްރާހީމް މުހައްމަދު ސޯލިހު އަރިހުގައި އެމްޑީޕީންނެވެ. ދެ ބޭފުޅުންނަކީ ވެސް އެމްޑީޕީ އުފެއްދީއްސުރެ އެޕާޓީގެ ހަރަކާތްތެރިންނެވެ.
އެގޮތުން އެޕާޓީގެ އުތުރު ޕްރޮވިންސްގެ ރައީސް ކަމާއި ޗެއާޕާސަންގެ ނައިބު އިދާރީގެ މަގާމު ވެސް އޭނާ އަދާކުރެެއްވި އެވެ. އެމްޑީޕީގެ ފުރަތަމަ ސަރުކާރުގައި އޭރުގެ ރައީސް މުހައްމަދު ނަޝީދު އުފެއްދެވި ޕްރޮވިންސްތަކުގެ ތެރެއިން އުތުރު ޕްރޮވިންސްގެ ސްޓޭޓް މިނިސްޓަރުކަން ތިން އަހަރު ކުރެއްވި އެވެ.
ނިޔާގެ އިޖުތިމާއީ ހިދުމަތް ބޮޑަށް ލިބުނީ އުފަން ރަށް ޅ. ހިންނަވަރަށެވެ. އޭނާ ވަނީ ހިންނަވަރު ހިރިޔާ ސްޕޯޓްސްގެ ޗެއާމަންކަން ފަސް އަހަރު ކުރައްވައިފަ އެވެ. ކްރިކެޓް ބޯޑް އޮފް މޯލްޑިވްސްގެ އެކްސްކޯގެ މެމްބަރުކަމާއި ވޮލީބޯލް އެސޯސިއޭޝަންގެ އެކްސްކޯ މެމްބަރުކަން ވެސް ކުރެއްވި އެވެ. އޭގެ އިތުރުން ވިކްޓްރީ ސްޕޯޓްސް އެކްސްކޯ މެމްބަރަކަށް ވެސް ހުންނެވި އެވެ.
ނިޔާގެ މެސެޖް ކުރެވެ: ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދުތައް ފުއްދާށާއި އެމްޑީޕީގެ އެޖެންޑާ 19 ތަންފީޒުކުރަން އަޅުގަނޑަށް ވޯޓު ދެއްވުން މުހިންމެވެ.
