ގދ. ގައްދުއަށް އުފަން އަމީތު އޯ ލެވެލް އާއި އޭ ލެވެލް ހެއްދެވީ މާލޭ އިންގްލިޝް ސްކޫލުންނާއި ސީއެޗްއެސްއީންނެވެ. މެކޭނިކަލް އިންޖިނިއަރިންގެ ދާއިރާ އިން ފުރަތަމަ ޑިގްރީ ނެންގެވީ މެލޭޝިއާގެ މަލްޓި މީޑިއާ ޔުނިވަސިޓީންނެވެ. މަތީ ތައުލީމަށް ފަހު، މިފްކޯ އަދި އޭގެ ފަހުން މޯލްޑިވްސް ޕެންޝަން އެޑްމިނިސްޓްރޭޝަންގައި ވަޒީފާ އަދާކުރެއްވި އެވެ. އަދި ދިޓީގެ ޕްރެޒެންޓަރެއްގެ ގޮތުން ހަތަރު އަހަރު ދުވަހު މަސައްކަތްކުރެއްވި އެވެ.
ޕްރޮފައިލް
އަމީތުގެ ސިޔާސީ ހަރަކާތް ފެށިފައިވަނީ 2014 ގައި ރައްޔިތުންގެ މަޖިލީހަށް އިންތިޚާބްވި ހިސާބުންނެވެ. އޭނާއަކީ ކުރީގެ ރައީސް އަބްދުﷲ ޔާމީންގެ ސަރުކާރާ ދެކޮޅަށް ނުކުންނަވައި، އަދި ގޮނޑި ގެއްލުނު ކަމަށް އޭރުގެ އިލެކްޝަންސް ކޮމިޝަނުން ކަނޑައެޅި 12 މެމްބަރުންގެ ތެރެއިން އެކެކެވެ. އިސްލާހީ މަސައްކަތުގައި ޖަލަށް ލީ މެމްބަރުންގެ ތެރޭގައި ވެސް އަމީތު ހިމެނިވަޑައިގަތެވެ. ޔާމީންގެ ވެރިކަމުގެ ފަހު ދެ އަހަރު، އިދިކޮޅު މެމްބަރުންގެ ތެރެއިން އޭނާ ފާހަގަކުރެވުނީ، ހިތްވަރުގަދަ، ކެރޭ ބޭފުޅެއްގެ ގޮތުގަ އެވެ.
އިޖުތިމާއީ ގޮތުން އެތައް ކަމެއްގައި އަމީތު، ސްކޫލް ދައުރުން ފެށިގެން، އުޅުއްވި އެވެ. އަދި މިހާރު ނިސްބަތްވަޑައިގަންނަވާ މަޑުއްވަރީ ދާއިރާއަށް ކުރިމަތިވާ މައްސަލަތަކާއި ދަތިތައް ހައްލުކުރަން އެކި ފެންވަރުގައި މަސައްކަތްކުރައްވަ އެވެ.
އަމީތުގެ މެސެޖަކީ މި އެވެ: "އަޒުމަކީ، އުއްމީދަކީ ހިތްވަރާ އެކު ދާއިރާގެ ރައްޔިތުންގެ ޚިދުމަތްކުރުން. ތަރައްގީއައިގެން ކުރިޔަށް ދިއުން."
