އަލީ އިބްރާހިމްގެ ގައުމީ ޚިދުމަތުގެ ބޮޑު ބައި ހޭދަކުރައްވާފައި ވަނީ ސިފައިންގޭގަ އެވެ. ގައުމީ ދިފާއީ ބާރުގައި އޭނާ ޚިދުމަތްކުރެއްވި 13 އަހަރުގެ ތެރޭގައި އިދާރީ އަދި އިގްތިސާދީ ދާއިރާ އިން ތަމްރީނާއި ތަޖްރިބާ ވަނީ ހާސިލްކުރައްވައިފަ އެވެ. އަލީ އިބްރާހިމް ގެންދަވަނީ 2014 އިން ފެށިގެން ގާނޫނީ ވަކީލެއްގެ ގޮތުގައި މަސައްކަތް ކުރައްވަމުންނެވެ.
ޕްރޮފައިލް
އަލީ އިބްރާހިމް ސިޔާސީ ދާއިރާއާ ގުޅިވަޑައިގެންނެވީ 2011 ވަނަ އަހަރު އެވެ. އޭނާ ވަނީ 2014ގެ ރައްޔިތުންގެ މަޖިލީހުގެ އިންތިޚާބުގައި ކުރީގެ ރައީސް މައުމޫން އަބްދުލް ގައްޔޫމުގެ ތާއީދާ އެކު ޕީޕީއެމްގެ ޓިކެޓުގައި ހިތަދޫ އުތުރު ދާއިރާއަށް ވާދަކުރައްވައިފަ އެވެ. ނަމަވެސް ފަހުން އޭނާ ޕީޕީއެމުން ވަކިވެވަޑައިގަތެވެ. އަލީ އިބްރާހިމް ވިދާޅުވާ ގޮތުގައި އޭނާ މިފަހަރު ކުރިމަތިލައްވަނީ އަމިއްލަ ކެންޑިޑޭޓެއްގެ ގޮތުގައި ނަމަވެސް ދާއިރާގެ ތަރައްގީގެ ޕްލޭނަަށް ރައީސް މައުމޫނުގެ ތާއީދު ވަނީ ލިބިވަޑައިގެންފަަ އެވެ. އިންތިޚާބުވެއްޖެ ނަމަ އޭނާ ދެމިހުންނަވާނީ ވެސް މިނިވަން މެންބަރެއްގެ ގޮތުގައި ކަމަށް ވިދާޅުވި އެވެ. ސިޔާސީ ޕާޓީއަށް ވުރެ އޭނާ އިސްކުރައްވަން ބޭނުން ވަނީ ރައްޔިތުންގެ އަޑާއި ދާއިރާގެ ތަރައްގީ އާއި ކުރިއެރުމެވެ.
އަލީ އިބްރާހިމް ގެންދަވަނީ ރައްޔިތުންގެ އަސާސީ ހައްގުތަކާ ގުޅޭ ކަންކަމުގައި ހިލޭ ސާބަހަށް ގާނޫނީ އެހީތެރިކަން ފޯރުކޮށްދެއްވަމުންނެވެ. ގާނޫނީ ވަކީލަކަށް 2014 ގައި ވެވަޑައިގަތުމާ އެކު އަލީ އިބްރާހިމްގެ އެ ޚިދުމަތް ހިތަދޫ ދާއިރާގެ އިތުރުން ރާއްޖޭގެ އެހެން ހިސާބުތަކުގެ މީހުންނަށް ވެސް ފޯރުކޮށްދެއްވަ އެވެ. އޭނާ ގެންދަވަނީ ގާނޫނީ ދާއިރާގެ ދަރިވަރުންނަށް ހިލޭސާބަހަށް ކިޔަވައި ދެއްވައި ދަރިވަރުން ތަމްރީނު ކުރުމުގެ މަސައްކަތް ވެސް ކުރައްވަމުންނެވެ.
"ދާއިރާ އަށް ބޭނުންވާ ގިނަ ކަންކަން ހުރީ ނުކުރެވި. އެކަމުގެ ވިސްނުމާއި ކެރުންތެރިކަން ނެތިގެން. އަޅުގަނޑު މި ނުކުންނަނީ ޕްލޭނަކާ އެކު އަދި އެ ޕްލޭނަށް ސިޔާސީ ތާއީދު ހޯދައިގެން،" އަލީ އިބްރާހިމް ވިދާޅުވި އެވެ.
"އަސާސީ ޚިދުމަތް ގާއިމްކުރުމާ އެކު ރާއްޖޭގެ ފައިނޭންޝަލް ކެޕިޓަލްގެ ގޮތުގައި އައްޑޫ ސިޓީ ތަރައްގީ ކުރުމަށް އަމާޒު ހިފައިގެން. އެހެންކަމުން ތަރައްގީގެ މި ބަދަލު ހިތަދޫ އުތުރު ދާއިރާގެ ރައްޔިތުން ގެންނާނެ ކަމަށް އަޅުގަނޑު ޔަގީން ކުރަން. އަޅުގަނޑުގެ ކެންޑިޑޭޓް ނަންބަރަކީ 4."
