ރާއްޖެޓީވީގެ ވިސާމޭ ބުނުމުން ނޭނގޭނެ މީހަކު ރާއްޖޭގައި މަދުވާނެ އެވެ. އުމުރުން އެންމެ 24 އަހަރުގެ ވިސާމަކީ ލ. ގަމަށް އުފަން ދަރިއެކެވެ. ހަމަދު ބިން ހަލީފާ އަލް ސާނީ ސްކޫލުން ތައުލީމު ހާސިލު ކުރެއްވުމަށް ފަހު، އުމުރުން ގާތްގަނޑަކަށް 18 އަހަރުގައި ނޫސްވެރިކަމުގެ ދާއިރާއަށް ނުކުންނެވި އެވެ.
ރާއްޖެޓީވީގައި ހޭދަކުރެއްވި ފަސް އަހަރު ގައުމުގައި ހިނގި ބޮޑު ހުރިހާ ކަމެއްގެ ކަވަރޭޖް ވަގުތުން ގެނެސްދެއްވުމުގައި ފަސްނުޖެހި މަސައްކަތްކުރެއްވި އެވެ.
ސިޔާސީ އެއްވުމެއް ވަގުތުން ގެނެސްދެއްވުމުގެ ތެރޭގައި 2016 ގައި އޭނާ ހައްޔަރުކޮށް ހުކުމް ވެސް ކުރި އެވެ. ވިސާމަކީ ނޫސްވެރިކަމުގެ މިނިވަންކަމަށް ވަރަށް ފާޅުގައި އަޑުއުފުއްލެވި ނޫސްވެރިއެކެވެ.
ޕްރޮފައިލް
އޭނާ ގެންދަވަނީ ސިޔާސީ ދާއިރާގައި ކުރިން ވެސް މަސައްކަތްކުރައްވަމުންނެވެ. އެގޮތުން 2014 ގެ އާންމު އިންތިހާބުގައި ގަމު ދާއިރާއަށް މިހާރުގެ އިކޮނޮމިކް މިނިސްޓަރު ފައްޔާޒު އިސްމާއިލް ވާދަކުރެއްވި އިރު އޭނާގެ ކެމްޕެއިންގައި އިސް ދައުރެއް އަދާކުރެއްވި އެވެ. އެކަމަކު މިއީ ވިސާމް އިންތިހާބަކަށް ކުރިމަތިލެއްވި ފުރަތަމަ ފަހަރެވެ.
ސްކޫލު ދައުރުން ފެށިގެން ވެސް ގަމުގައި އިޖްތިމާއީ ގޮތުން އޭނާ ގެންދަވަނީ މަސައްކަތްކުރައްވަމުންނެވެ. އެގޮތުން ހަމަދު ބިން ހަލީފާ އަލް ސާނީ ސްކޫލުގެ އިސް ދަރިވަރުންގެ ޖަމިއްޔާ އުފެއްދެވީ އޭނާގެ އިސްނެގުމުގެ މަތިންނެވެ. އެ ޖަމިއްޔާ މެދުވެރިކޮށް ގަމުގެ ތިން އަވަށުގެ ރައްޔިތުންނަށް އަމާޒުކޮށް ހޭލުންތެރިކުރުވުމުގެ ތަފާތު ޕްރޮގްރާމްތައް ހިންގެވި އެވެ. އަދި ގެވެށި އަނިޔާއަށް ހޭލުންތެރިކުރަން މުޅި ލ. އަތޮޅުގައި ހާއްސަ ކެމްޕެއިނެއް ވެސް ކުރިއަށްގެންދެވި އެވެ.
"މާޒީން އިބްރަތް ހާސިލުކޮށް، ސަރުކާރަށް ނިސްބަތްވާ މަޖިލިސް މެންބަރެއް ހޮވަން ރައްޔިތުން އޭނާއަށް ވޯޓު ދިނުން މުހިއްމު" ކަމަށް ވިސާމް ވިދާޅުވި އެވެ. އަދި ގަމުގެ ތަރައްގީއަށް މުހިއްމު ބަދަލުތަކެއް "އެޖެންޑާ 19" ގެ ތެރެއިން ގެނެވޭނެ ކަމަށް ވެސް އޭނާ ގަބޫލުކުރައްވަ އެވެ.
