ހުސައިން މުހައްމަދު ގިނަ ބަޔަކަށް ފާހަގަވެފައި އޮންނާނީ ބްރޯޑްކާސްޓިން ދާއިރާއިންނެވެ. ތަޖުރިބާކާރު ބްރޯޑްކާސްޓަރެއްގެ ހައިސިއްޔަތުން މީޑިއާގައި ކުރެއްވި ޚިދުމަތުގެ ސަފްހާތަކުން ޓީވީ މޯލްޑިވްސްގެ ޑިރެކްޓަ ޖެނެރަލްގެ މަގާމުގައި ހުންނަވައިގެން އެތަން ހިންގެވި އެވެ. މީގެ އިތުރުން ހުސައިން މުހައްމަދަކީ ތައުލީމީ ދާއިރާގައި ވެސް އަގުހުރި ޚިދުމަތްތަކެއް ކުރައްވާފައިވާ ބޭފުޅެކެވެ.
އެޑިއުކޭޝަން މިނިސްޓްރީގެ މިނިސްޓަރުގެ ނައިބުގެ މަގާމުގައި ހުންނަވައިގެން ހުސައިން މުހައްމަދު އެންމެ ބޮޑު ޒިންމާއެއް ނެންގެވީ ސްކޫލްތައް އިމާރާތް ކުރުމުގެ ދާއިރާ އިންނެވެ.
ޕްރޮފައިލް
ރާއްޖެ އަށް ސިޔާސީ ޕާޓީތައް 2005 ގައި ތައާރަފްވެ ދިވެހި ރައްޔިތުންގެ ޕާޓީ (ޑީއާރްޕީ) ވުޖޫދުވަމުން އައި އިރު އެ ޕާޓީ އުފެއްދުމުގެ ކުރީ ސަފުގައި ހުސައިން ހުންނެވި އެވެ. ނަމަވެސް ޑީއާރުޕީގެ ތެރޭގައި ބައިބައިވުން އުފެދި އެ ޕާޓީ ހީނަރުވުމުން ދެން ގުޅިވަޑައިގެންނެވީ، 2013 ގައި ޖުމްހޫރީ ޕާޓީއާ އެވެ. ހުސައިން މުހައްމަދު މިއަދާ ހަމައަށް ވެސް ގެންދަވަނީ ޖުމްހޫރީ ޕާޓީގެ މެންބަރެއްގެ ގޮތުގައި ހުންނަވައިގެން ރައްޔިތުންގެ މަޖިލީހުގައި އއ. މަތިވެރި ދާއިރާ ތަމްސީލް ކުރައްވަމުންނެވެ. އާ ގާނޫނުއަސާސީ ހެދި އިރު ރައްޔިތުންގެ ޚާއްސަ މަޖިލީހުގައި ވެސް އޭނާ އުޅުއްވި އެވެ.
ހުސައިން މުހައްމަދު ނިސްބަތްވެވަޑައިގަންނަވާ މަތިވެރި ދާއިރާގެ ކްލަބް، ޖަމިއްޔާތަކުން ބާއްވާ މުބާރާތްތަކަށް އެހީ ދެއްވުމަކީ އޭނާގެ އާދައެކެވެ. އެފަދަ ހަރަކާތްތަކުގެ ސަބަބުން ޒުވާނުންގެ މެދުގައި ގުޅުން ވަރުގަދަވެ، ޒުވާނުންގެ ހުނަރު ތަރައްގީކުރަން އެހީތެރިވެވޭ ކަމަށް އޭނާ ގަބޫލުކުރައްވަ އެވެ.
ހުސައިން މުހައްމަދުގެ މެސެޖް ކުރުވެފައި ސާފެވެ.
"ދާއިރާގެ ރައްޔިތުން އަޅުގަނޑަށް އިތުބާރުކޮށް، ވޯޓު ދެއްވުން ވަރަށް ބޮޑަށް އެދެން،" ހުސައިން ވިދާޅުވި އެވެ.
