ޔާމީން އަހުމަދު (ޔާންޓެ) އަކީ ވިލިމާލޭގައި ކުރީއްސުރެ ދިރިއުޅުއްވާ އަދި އެ އަވަށުގައި ނަން ހިނގާ ޒުވާނެކެވެ. ޖަމިއްޔާތަކުގަ އާއި ސިޔާސީ ދާއިރާގައި ވެސް އޭނާގެ ހިދުމަތް ލިބިފައި ވަނީ އެ އަވަށަށެވެ. މަސައްކަތުގެ ތަޖުރިބާއަށް ބަލާއިރު ރާއްޖޭގައި އެންމެ ފުރަތަމަ ހުޅުވި އަމިއްލަ ޓީވީ ސްޓޭޝަން ކަމަށްވާ ދިޓީވީގެ ސޭލްސް އެންޑް މާކެޓިން އެގްޒެކެޓިވެއްގެ ގޮތުގައި މަސައްކަތްކުރެއްވި އެވެ.
ޕްރޮފައިލް
ޔާމީންގެ ސިޔާސީ މަސައްކަތްތައް ފެއްޓެވީ އެމްޑީޕީގެ ތެރެއިންނެވެ. އެގޮތުން ރާއްޖޭގައި ބޭއްވި ގިނަ ޕާޓީތައް އެކުލެވޭ ފުރަތަމަ އިންތިހާބު ކަމަށްވާ، 2008 ގެ ރިޔާސީ އިންތިހާބުން ފެށިގެން އެމްޑީޕީގެ ކެމްޕެއިންތަކުގައި އަމަލީ ގޮތުން އަންނަނީ ހަރަކާތްތެރިވަމުންނެވެ. އަދި އޭނާ އަކީ 2012 އިން ފެށިގެން އެމްޑީޕީގެ ވިލިމާލޭ ގޮފީގެ ނައިބް ރައީސެވެ. މިއީ ޔާމީން ވާދަކުރައްވާ ރައްޔިތުންގެ މަޖިލިހުގެ ފުރަތަމަ އިންތިހާބެވެ.
ވިލިމާލެ އަކީ މާލެ ސަރަހައްދުގައި އިޖުތިމާއީ ހަރަކާތް އެންމެ ފުޅާކޮށް ކުރިއަށްގެންދާ ރަށެވެ. އެގޮތުން ކުޅިވަރުގެ ތެރެއިން ޒުވާނުންނަށް ވަރަށް ގިނަ ހަރަކާތްތައް އަބަދުވެސް އޮވެ އެވެ. ޔާމީނަކީ، ފަރުދީ ތަރައްގީއަށް އެ ރަށުގައި އުފެއްދި ފުރަތަމަ ޖަމިއްޔާ ކަމަށްވާ "ވަށި ޖަމިއްޔާ" ގެ އިސް މެމްބަރެކެވެ.
ޔާމީންގެ ހުވަފެނަކީ ތަރައްގީވެފައިވާ ސިޓީއަކުން ލިބިދޭން ޖެހޭ އަސާސީ ހައްގުތައް ވިލިމާލެ އަށް ކަށަވަރުކޮށްދިނުމެވެ. އެމްޑީޕީގެ އެޖެންޑާ 19 ގެ ތެރެއިން، ގައުމަށް ހުރިހާ ގޮތަކުން ވެސް ތަރައްގީ އަންނާނެ ކަމަކަށް ވާތީ، ޔާމީންގެ މެސެޖަކީ، "އެ އެޖެންޑާ ތަންފީޒްކޮށް، ދާއިރާ އަށް ތަރައްގީ ގެންނަން އަޅުގަނޑަށް ވޯޓު ދޭށެ"ވެ.
