ހާރޫން ރަޝީދަކީ ވިލިނގިއްޔަށް އުފަން ބޭފުޅެކެވެ. އެރަށުން ސާނަވީ ތައުލީމު ހާސިލުކުރައްވާފައިވާ އިރު އޭނާ ފަސްޓް ޑިގްރީ ނެންގެވީ މޯލްޑިވްސް ބިޒްނަސް ސްކޫލުންނެވެ. އެއަށް ފަހު އޭނާ ވަނީ ލަންކާގެ ބްރިޖު ސްކޫލު އޮފް ކޮމާސް އިން މާސްޓާސް އިން ބިޒްނަސް އެޑްމިނިސްޓްރޭޝަން ހައްދަވައިފަ އެވެ.
ކުރީގެ ގއ. އަތޮޅު އޮފީހުގެ ޕްރޮޖެކްޓް އޮފިސަރެއްގެ މަގާމުގައި 1996 އިން 2002 އަށް ހުންނެވި އެވެ. އަދި އޭގެ ފަހުން 2008 ވަނަ އަހަރާ ހަމަޔަށް އަތޮޅު އޮފީހުގެ ސެކްރެޓަރީކަން ވެސް ކުރެއްވި އެވެ. ސިޔާސީ މައިދާނަށް އޭނާ ނުކުންނެވީ 2008 ގެ ފަހުންނެވެ.
ޕްރޮފައިލް
ހާރޫނަކީ އެމްޑީޕީ ސަރުކާރުގައި އޭރުގެ ރައީސް މުހައްމަދު ނަޝީދު އައްޔަންކުރެއްވި އެއް ކައުންސިލަރެވެ. އެގޮތުން 2009 އިން 2011 އަށް ވިލިނގިލީ ރަށު އޮފީހުގައި އުޅުއްވި އެވެ. އަދި 2011 ގައި ބޭއްވި ފުރަތަމަ ކައުންސިލް އިންތިހާބުގައި ގއ. އަތޮޅު ގޮނޑިއަށް ވާދަކުރައްވައި ކާމިޔާބުކުރެއްވި އެވެ. އޭނާއަކީ 2014އާ ހަމައަށް ގއ. އަތޮޅު ކައުންސިލްގެ ރައީސް އެވެ. އަދި އެ އަހަރު އޮތް ރައްޔިތުންގެ މަޖިލިހުގެ އިންތިހާބުގައި ވިލިނގިލީ ގޮނޑިއަށް ވާދަ ވެސް ކުރެއްވި އެވެ.
އަތޮޅު އޮފީހުގައި އުޅުއްވި ދުވަސްވަރު އޭނާ ވަނީ ގއ އަތޮޅުގައި ހިންގި އިޖްތިމާއީ ގިނަ ކަންކަން ރޭވުމުގެ އިތުރުން އަމަލީ ގޮތުން ވެސް ބައިވެރިވެވަޑައިގެންފަ އެވެ. އެގޮތުން އިޖުތިމާއީ ގޮތުން ކުރިއަށްގެންދާ ކޮމިއުނިޓީ ޑިވެލޮޕްމެންޓް ހަރަކާތްތަކުގައި އޭނާގެ ހިއްސާ އެ އަތޮޅުގައި ބޮޑެވެ.
ހާރޫނު ގަބޫލުކުރައްވާ ގޮތުގައި އެމްޑީޕީގެ ސަރުކާރެއްގައި މަޖިލީހުގައި އެ ދާއިރާ ތަމްސީލްކުރައްވަން އެމްޑީޕީގެ މެމްބަރަކު ހުންނެވުމުން މާ ބޮޑަށް މަސައްކަތް ކުރެއްވޭނެ އެވެ. އެހެންކަމުން އޭނާއަށް ވޯޓު ދިނުމަކީ ރައްޔިތުންގެ ލާބަޔާއި ފާގަތިކަމަށް ދޭ ވޯޓެއް ކަމަށް ވިދާޅުވި އެވެ.
