ތިމަރަފުއްޓަށް އުފަން މުސްތަފާ އަކީ އުމުރުން އެންމެ 14 އަހަރުން ފެށިގެން މިއަދާ ހަމަޔަށް ވިޔަފާރި ކުރައްވަމުން ގެންދަވާ ބޭފުޅެކެވެ. އޭނާ ވަނީ ރާއްޖޭގައި ފުޅާ ދާއިރާއެއްގައި މަސް އެކްސްޕޯޓް ކުރުމުގެ ވިޔަފާރީގައި އުޅުއްވައިފަ އެވެ. މުސްތަފާ ވެވަޑައިގެންފައި ވަނީ 1980 ގެ އަހަރުތަކުގެ ފަހުކޮޅު އިމްޕޯޓް އެކްސްޕޯޓް ވިޔަފާރިން އެންމެ ބޮޑު އާމްދަނީއެއް ހޯއްދެވި އެއް ވިޔަފާރިވެރިއަށެވެ.
ޕްރޮފައިލް
މުސްތަވާ ސިޔާސީ ކަންކަމުގެ ތެރެއަށް ވެންނެވީ 2004 ވަނަ އަހަރު އެވެ. އެގޮތުން އެމްޑީޕީން ކުރިއަށްގެންދިޔަ ސިޔާސީ ހަރަކާތްތައް ބާއްވަން މާކަރީ ލައިޓް އިމާރާތް ހުރި ބިން ހޯދައިގެން އެކަމަށް ފުރުސަތު ތަނަވަސްކޮށްދެއްވި އެވެ. ނަތީޖާއެއްގެ ގޮތުން އޭރުގެ ސަރުކާރުން އެ ބިން އަތުލައި، މުސްތަފާ ޖަލަށް ވެސް ލި އެވެ.
އާ ގާނޫނުއަސަސީގެ ދަށުން ބޭއްވި ރައްޔިތުންގެ މަޖިލިހުގެ ފުރަތަމަ އިންތިހާބު 2009 ގައި ކާމިޔާބުކުރައްވައި، ތިމަރަފުށި ދާއިރާއިން މަޖިލިހަށް ވަޑައިގަތެވެ. މިހާރު ވެސް އޭނާ ތަމްސީލްކުރަައްވަމުން ގެންދަވަނީ އެ ދާއިރާ އެވެ.
ދެ ވަނަ ދައުރަކަށް 2014 ގައި ހޮވިވަޑައިގަތަސް، އިންތިހާބު ނިމުނުތާ މާ ގިނަ ދުވަހެއް ނުވެ، ޕީޕީއެމްއާ ގުޅިވަޑައިގަތެވެ. އަދި 2017 ގައި އޭރުގެ ރައީސް އަބްދުﷲ ޔާމީން ދޫކުރައްވައި، އިދިކޮޅު ހަަރަކާތާ ގުޅިވަޑައިގަތުމުން މަޖިލިހުގެ ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅި 12 މެމްބަރުންގެ ތެރޭގައި ވެސް އޭނާ ހިމެނިވަޑައިގަތެވެ. އޭގެ ފަހުން މުސްތަފާ އަކީ ޔާމީންގެ ސަރުކާރަށް ކެރިގެން އެންމެ ބޮޑަށް ފާޑުވިދާޅުވި އެއް މެމްބަރެވެ.
ތިމަރަފުށީގެ ތަރައްގީއަށް ކުރި ހުރިހާ ކަމެއްގައި ހެން މުސްތަފާގެ ހިއްސާ ބޮޑެވެ. އަދި ދާއިރާގެ ހުރިހާ ރައްޔިތުންނަށް ތަފާތު ކުރުމެއް ނެތި ހަރަދުކުރައްވަ އެވެ.
ރަށުގައި ތިބެގެން އާމްދަނީ ލިބޭނެ ވަސީލަތްތައް ގާއިމްކޮށްދެއްވުމަކީ އެންމެ ބޮޑު އެއް އަމާޒެވެ. އެގޮތުން ދާއިރާގެ ކޮންމެ ގޭބީސީއެއްގައި ވަޒީފާ އަދާކުރާ އެކަކު ހުރުމަކީ އޭނާގެ މަގުސަދެވެ.
