ބ. އަތޮޅުގެ މެމްބަރުކަން ކުރެއްވި ޝެއިހް ހުސެއިން ޔޫސުފްގެ ދަރިކަނބަލުން ހިސާން އެންމެ ފުރަތަމަ އުޅުއްވީ ބަންޑާރަ ނައިބު އޮފީހުގައި ދައުލަތުގެ ވަކީލެއްގެ ގޮތުގަ އެވެ. ހިސާން ވަނީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި އެސިސްޓަންޓް އެޓާނީ ޖެނެރަލްކަން ވެސް ކުރައްވައިފަ އެވެ.
ބަންޑާރަ ނައިބުގެ އޮފީހުން ވަކިވެވަޑައިގެން އޭނާ ގުޅިވަޑައިގަތީ އޭރުގެ އިދިކޮޅު ޕާޓީ އެމްޑީޕީއާ އެވެ. ގާނޫނީ ދާއިރާ އިން މާސްޓާސް އަދި ޑިގްރީ ހާސިލް ކުރެއްވި ހިސާން ވަނީ އެމްޑީޕީގެ ވެރިކަމުގައި ރައީސް އޮފީހުގެ ލީގަލް އެފެއާޒް ސެކްރެޓަރީގެ މަގާމު ތިން އަހަރު ދުވަހު ފުރުއްވައިފަ އެވެ. އޭނާ ފާހަގަކުރެވެނީ އިންސާނީ ހައްގުތައް ހިމާޔަތްކުރައްވަން އެންމެ ބޮޑަށް މަސައްކަތްކުރައްވާ ވަކީލުންގެ ތެރޭގަ އެވެ.
ޕްރޮފައިލް
އެމްޑީޕީއާ ގުޅިވަޑައިގެން ގާނޫނީ ދާއިރާގެ ކަންކަމުގައި ހިސާން އެހީތެރިވެވަޑައިގެންނެވީ އެއްވެސް ފޫހިކަމެއް ނެތި އެވެ. ފުލުސް އޮފީހަށް ނުވަތަ ޝަރުއީ ކޯޓުތަކަށް ސިޔާސީ ބޮޑެތި ބޭފުޅުންގެ ފަހަތްޕުޅުން، އެ ބޭފުޅުން ދިފާއުކުރެއްވުމުގައި އެންމެ ބޮޑު މަސައްކަތެއް ކުރެއްވީ ވެސް ހިސާން އެވެ. ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދާއި ރައްޔިތުންގެ މަޖިލިހުގެ ރައީސް ގާސިމް އިބްރާހިމް ފަދަ ސިޔާސީ "ހަރު" ބޭފުޅުންގެ ވަކީލަކަށް ހިސާން މަސައްކަތް ކުރެއްވި އެވެ. ކުރީގެ އުއްތަމަ ފަނޑިޔާރު އަބްދުﷲ ސައީދުގެ ދިފާއުގައި ވެސް ނުކުންނެވީ ހިސާނެވެ.
ދިވެހިންގެ އެކި ކަންކަމުގައި ކޯޓުތަކުގައި ވަކާލާތު ކުރެއްވުމުގެ ފުރުސަތު ލިބިވަޑައިގަތުމަކީ އިޖުތިމާއީ ގޮތުން ހިސާން އަށް ފުރިހަމަކޮށްދެވޭ އެންމެ ބޮޑު ހިދުމަތެވެ. އެންމެ އާދައިގެ މީހާއާ ވެސް އޭނާއާ ގުޅެ އެވެ. އޭނާއަށް ދެއްވެން އޮންނަ އެހީތެރިކަމެއް، ގާނޫނީ ދާއިރާ އިން ދެއްވަ އެވެ.
"ސާބިތުކަމާ އެކީ ކުރާ މަސައްކަތުގައި ދެމިހުރުމަކީ މުހިންމު ކަމެއް" ކަމަށް ހިސާން ވިދާޅުވެ އެވެ.
"އެމީހަކު ހާސިލް ކުރަން ބޭނުންވާ ހުރިހާ ކަމެއް ނުވެދާނެ. އެކަމަކު އެމީހަކު ބަދަލު ނުވެ ހުރުން މުހިންމު،" ހިސާން ވިދާޅުވި އެވެ.
