ރ. ފައިނަށް އުފަން މުހައްމަދު ވަހީދު (ވައްޑެ) ކުރިން ވަނީ ހެލްތު މިނިސްޓްރީ އާއި އެންވަޔަރަމަންޓް މިނިސްޓްރީގަ އާއި ވޭސްޓް މެނޭޖްމަންޓް ކޮންސަލްޓަންޓެއްގެ ގޮތުގައި މަސައްކަތް ކުރައްވައިފަ އެވެ. "މިއަދު" ނޫހުގެ ޑެޕިއުޓީ އެޑިޓަރުކަމާއި ރ. އަތޮޅުގެ ކައުންސިލަރުކަން ވެސް ކުރެއްވި އެވެ.
ޕްރޮފައިލް
ވައްޑެއަކީ ސިޔާސީ މަސައްކަތުގައި ރ. އަތޮޅުގައި އެންމެ ފަރިތަ އެއް މޫނެވެ. އޭނާއަކީ އަޑު އުފުލަން ކެރޭ، އާންމު މޫނެކެވެ. ރާއްޖޭގައި އިސްލާހީ ހަރަކާތް ފެށުނީއްސުރެ، އެމްޑީޕީގެ މެމްބަރެއްގެ ގޮތުގައި ހުންނެވި އެވެ. މިހާރު އޭނާއަކީ އެމްޑީޕީގެ އުނގޫފާރު ދާއިރާގެ ރައީސެވެ. އިސްލާހީ ހަރަކާތްތަކުގައި އުޅުއްވުމުގެ ތެރޭގައި އެތައް ފަހަރަކު ހައްޔަރު ވެސް ކުރި އެވެ.
އެމްޑީޕީގެ މީޑިއާ ޓީމާއި ކެމްޕެއިން ޓީމުގައި ގަވައިދުން ވައްޑެ މަސައްކަތް ކުރައްވަ އެވެ. "ޖަޒީރާ" ރާއްޖެ މެނިފެސްޓޯ ތައްޔާރުކޮށް ލިޔުއްވުމުގައި އޭނާ އިސް ރޯލެއް އަދާކުރެއްވި އެވެ.
ލާމަރުކަޒީ ނިޒާމު ރާއްޖެ ހިންގުމާއި، ތިމާވެއްޓަށް ކުރާ ނޭދެވޭ އަސަރުތަކާ ދެކޮޅަށް އަޑު އުފުއްލަވައި، ލިޔުއްވުމުގައި އޭނާގެ ގަލަން ހިނގަ އެވެ. އެއީ ރައްޔިތުންގެ ގާތަށް ގޮސް، އާންމުން ހޭލުންތެރި ކުރުވައި، އެކަންކަމުގެ ހައްގުގައި ވަކާލާތު ކުރައްވަމުން އަންނަ ބޭފުޅެކެވެ. ވައްޑެ ވިދާޅުވި ގޮތުގައި އާންމުން ހޭލުންތެރި ކުރުވުމަށް ރާއްޖޭގެ ދެ އަތޮޅެއް ފިޔަވައި ހުރިހާ އަތޮޅަކަށް ވަޑައިގެންނެވި އެވެ.
"ފުރިހަމަ ލާމަރުކަޒީ ނިޒާމެއް ގާއިމު ކުރަން ޖެހޭ. ހަމައެކަނި ނަމަކަށް އިދާރީ އިހްތިޔާރުތަކެއް ދިނުމަކުން ނުފުދޭ. އިގްތިސާދާއި ވިޔަފާރި ވެސް ލާމަރުކަޒީ ވާން ޖެހޭ،" ވައްޑެ ފުރަތަމަ ވެސް ވިދާޅުވީ އެހެންނެވެ.
ޒަރޫރީ ބޭނުންތަކާއި މުހުތާދުތައް ފުރިހަމަކުރަން އުނގޫފާރު ދާއިރާގެ ރައްޔިތުން މާލެ ދިއުމުގެ ބަދަލުގައި އަތޮޅުގެ ތެރެއިން ހަމަޖެހޭ ނިޒާމެއް ގާއިމްކުރުމަކީ އޭނާގެ އެއް ވިސްނެވުމެވެ.
